ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន នារសៀលថ្ងៃទី១៩ ខែមេសា ឆ្នាំ២០២៣ បានបង្ហោះរូបភាពផ្អែមល្អែមជាមួយភរិយាកាលពីព្រឹត្តិការណ៍អង្គរសង្រ្កាន្ត និងរូបមួយទៀតកាលពីថ្ងៃអបអរខួបកំណើតអាយុ ៧១ឆ្នាំរបស់សម្តេចដែលកូនចៅបានរៀបចំទុកកាលពីឆ្នាំ២០២២។

សម្តេចបានថ្លែងនៅក្នុងទំព័រហ្វេសប៊ុកផ្លូវការដូច្នេះថា៖ «មានបងប្អូនមួយចំនួនមានយោបល់ថា រូបថតខ្ញុំនិងភរិយាក្នុងឈុតសម្លៀកបំពាក់ថ្ងៃបើកអង្គរសង្រ្កាន្តជារូបថតដែលស្អាតក្នុងចំណោមរូបថតដែលស្អាតនៃបងប្អូនផ្សេងទៀតក្នុងគ្រានោះដែរ»។

សម្តេចក៏បានចោទសួរអ្នកលេងបណ្តាញសង្គមថា តើរូបភាពមួយណាដែលសម្តេចទាំងទ្វេនៅក្មេងជាង និងស្អាតជាង បើធៀបនឹងរូបភាពឥឡូវៗ និងកាលពីប៉ុន្មានឆ្នាំមុន?

សម្តេចថ្លែងថា៖ «ខ្ញុំមិនហ៊ាននិយាយខ្លួនឯងទេទុកឲ្យបងប្អូនប្រៀបធៀបរូបថតកាលពី ៣ឆ្នាំមុនជាមួយរូបថតនាពេលនេះតើមួយណាក្មេងជាងនិងស្អាតជាង»៕